ՄԻԵԴ դիմելու չափորոշիչների փոփոխությունները, ՀՀ Վճռաբեկ դատարանի ոչ իրավաչափ պահանջները. մայիսի 25, 2015 թ., Երևան, ՀՀ Փաստաբանների պալատ

<<Ուրբաթ ակումբը>> փաստաբանների ոչ պաշտոնական հանդիպում է, որը փաստաբանների խնդրանքով կազմակերպվում է Պալատի կողմից այն դեպքերում, երբ առկա են անհապաղ քննարկման ենթակա հարցեր, ինչպիսիք են օրինակ, առաջարկվող օրենսդրական փոփոխությունները, որոնք կազդեն փաստաբանների աշխատանքի վրա:

<<Ուրբաթ ակումբը>> իր գործունեությունը սկսել է ԱՄՆ ՄԶԳ ֆինանսավորմամբ, Ամերիկյան իրավաբանների ընկերակցության կողմից և այժմ հանդիսանում է շարունակական նախաձեռնություն: ՀՀ Փաստաբանների պալատը և Ամերիկյան իրավաբանների ընկերակցությունը (ABA ROLI) եկան այն համաձայնության, որ վերջինս կաջակցի <<Ուրբաթ ակումբի>> հանդիպումների բովանդակության կազմմանը՝ փաստաբանական համայնքից հավաքելով կարծիքներ անհրաժեշտ դասընթացների թեմաների կամ այն մասին, թե ինչ խնդիրների առջև են կանգնում պաշտպանները գործնականում: <<Ուրբաթ ակումբ>> քննարկումների ամփոփումները և արդյունքները Փաստաբանների պալատի կայքի և ֆեյսբուքյան էջի միջոցով հասանելի են իրավաբանական համայնքի և ընդհանրապես հասարակության համար, ինչպես նաև ակտիվորեն քննարկվում են <<Ֆեյսբուքում>>: Իրավաբանի մասնագիտության վրա ազդող հարցերի քննարկումը փաստաբաններին օգնում է գտնել և հանդես գալ միասնական ձայնով՝ պահպանելու, պաշտպանելու և նպաստելու իրենց մասնագիտության զարգացմանը:

<<Ուրբաթ ակումբը>> շարունակաբար ապացուցում է, որ վերջինս հանդիսանում է արդյունավետ հանդիպման վայր, որտեղ հիմնական շահագրգիռ կողմերի միջև քննարկվում են հարցեր, հետազոտվում են խնդիրներ և հնարավոր լուծումների վերաբերյալ կազմվում են առաջարկություններ, որոնց հիման վրա կատարվում են գործնական քայլեր: <<Ուրբաթ ակումբների>> արդյունքում կազմված առաջարկությունները Պալատի նախագահի կողմից ներկայացվել են Պետական ռեգիստրի ուշադրությանը, ինչը հանգեցրել է փոփոխությունների և վերջնական արդյունքների:

<<Ուրբաթ ակումբ>> հանդիպում. ՄԻԵԴ դիմելու չափորոշիչների փոփոխությունները, ՀՀ Վճռաբեկ դատարանի ոչ իրավաչափ պահանջները. մայիսի 25, 2015 թ., Երևան, ՀՀ Փաստաբանների պալատ

Վերջերս ՄԻԵԴ-ը փոխել է դիմումների վերաբերյալ պահանջները` նախատեսելով անհրաժեշտ ամբողջ տեղեկատվության համար առավել կարճ ձևաթուղթ` անկախ գործի ծավալից կամ բարդությունից: Այս նոր տեխնիկական պահանջը լուրջ խնդիր դարձավ փաստաբանների համար, ովքեր հաճախ են ՄԻԵԴ ներկայացնում դիմումներ: Փորձագետ Արայիկ Ղազարյանը հանդիպման ընթացքում քննարկեց բոլոր նոր պահանջները` ուղղորդելով փաստաբաններին` ինչպես ներկայացնել իրենց բողոքները և գործի նկարագրությունը նոր, ավելի կարճ ձևաչափի պահանջներին համապատասխան: Բացի այդ, քննարկվել է նաև ՀՀ Վճռաբեկ դատարանի պահանջը փաստաբաններին՝ ներկայացնելու իրենց բողոքներում վկայակոչվող ՄԻԵԴ-ի գործերի հայերեն թարգմանությունները:
Դա փաստաբանների համար առաջացրեց լուրջ խնդիրներ հետևյալ պատճառներով. 1. Առկա չեն ՄԻԵԴ-ի բոլոր նախադեպային որոշումների հայերեն թարգմանությունները: Ավելին, այդպիսի թարգմանություն ապահովելը լրացուցիչ զգալի ծախս է քաղաքացիների և հատկապես հանրային պաշտպանների համար, քանի որ վերջիններս այդպիսի ծախսերի համար պետությունից փոխհատուցում չեն ստանում:
2. Թարգմանությունների ապահովումը պետության պարտականությունն է, քանի որ ՄԻԵԴ-ի որոշումները ՀՀ օրենսդրության մասն են կազմում: Պետությունն իր ողջ օրենսդրությունը հայերենով հասանելի դարձնելու պարտականություն է կրում: Նա չի կարող այս պարտականությունը դնել փաստաբանների և քաղաքացիների վրա:
3. Նույնիսկ եթե փաստաբանները ներկայացնեն թարգմանված տարբերակը, այն չի համարվի պաշտոնական: Դատավորները չեն կարող հիմնվել ոչ պաշտոնական թարգմանության վրա, քանի որ թարգմանության մեջ սխալներն անխուսափելի են:
4. Ոչ պաշտոնական թարգմանությունները հասանելի են ՀՀ Արդարադատության նախարարության, ՀՀ Դատավորների միության կայքերում, ՄԻԵԴ-ի հայկական փաստաթղթերի էջում: Այդ աղբյուրները հասանելի են փաստաբանների համար:
Հանդիպման ընթացքում մասնակիցները, հետագա երկխոսություն ծավալելու նպատակով, որոշեցին ՀՀ Վճռաբեկ դատարանի այս պահանջի ոչ իրավաչափության վերաբերյալ հուշագիր գրել: